பன்னிரு கரத்தான் திருவடியைப் பற்றிட இன்பம் பெருகிடுமே

பன்னிரு கரத்தான் திருவடியைப்
பற்றிட இன்பம் பெருகிடுமே
வற்றிய குளத்தில் தாமரை போல்
வாடிடும் நிலை தான் ஓடிடுமே ....

முன் வினைப் பயனது அறுந்திடவும்
முகம் அது மலர்ச்சி பெற்றிடவும்
கந்தனின் அருளைப் போற்றி நிற்கும்
கந்த சஷ்டி கவசத்தை ஓதிடுங்கள்.....

அல்லலைப் போக்கிடும்  அவன் கவசம்
அமுதினும் இனிய சொற் குடமாம்
நல்லதை நினைந்து எந்நாளும் இங்கே
நவின்றவர் வாழ்விற்கோர்  துன்பமில்லை..

அரக்கர்களை  அழித்துத் தேவர்களுக்கும்
அமைதியைக் கொடுத்த முருகனுக்கு
மனம் அது பாற் கடல் என்றுணர்ந்தால்
மகிழ்வுடன் விரதம் இருந்திடுங்கள் ....

நினைத்தது நடக்கும் அவனருளால்
நினைத்தவர் உள்ளம் மகிழ்வு பெற
இனித்திடும் செந்தமிழ்க் காவலனை
இன்னிசையாலே போற்றிடுங்கள் .............